لازم تدفع

حاولت أمسك نفسى .. لكن بجد مش قادر .. دماغى خلاص تعبت ..

معلش إستحملونى .. واستحملوا هذا الاسهاب : (

لأمتى ؟
لأمتى هفضل أضحك على نفسى ..
مالهاش حل بجد خلاص ..

خلاص مش قادر اهرب من الأحاسيس السلبية اللى بحس بيها
عمال اقول لا لسا فى امل فى بكرة و لازم اجرب مرة واتنين وعشرة

اصبر و أستحمل
بكرة تلافى نفسك أحسن انجح أفضل
بكرة تلاقى كل الدنيا كويسة

ناس شريفة نضيفة عندها دين و فكر
عاوزه تكبر و تتقدم ..
ناس عاوزه تتعاون على الخير علشان الغنى يقف جنب الفقير
القوى يقف جنب المسكين اللى بيتعذب كل يوم من قسوة و جمود وجحود من لا يستحقوا ان يطلق عليهم ناس ..

لكــــن
مفيش حاجة نافعة ..

كل يوم اليأس من كل حاجة جوايا و برايا و مع الناس بيكبر و يرسخ

فى الشغل فى الشارع فى المواصلات

ياترى انا صح ياترى هاقدر انجح بالرغم من كل الاحباطات الى انا عايش فيها

إصحاب مهمشين مطحونين مرغومين مدهولين

اللى بيموت نفسه علشان يتجوز
واللى بيموت نفسه علشان يجيب عربية و يرحم نفسه من البهدلة فى المواصلات
و يرحم أهله من البهدلة فى أى مشوار ...

كل ذنبه انه مش معاه فلوس كفاية علشان يشعر انى بنى آدم

بجد خلاص يا مصر خلاص يا بلد ..
ليه اللى بيحصل ده ..
لم يعد هناك مكان للشرفاء ..

شريف و طيب و خلوق يبقى أكيد فقير ..

بيداس عليه بالجزم من كل اللى حواليه ..

بيداس عليه و تتهان كرامته .. و احنا طالعين نرقص زى العوالم فى الاحتفال بكاس الامم
وبنكسر العربيات فى شارعى الهرم وفيصل
ونغنى و نشتم ونولع علب البيروسول ..

بحد هوس هيستيريا ..
شعب مكتئب مجبط عنده هستيريا حتى فى الفرح

إستحالة يبقى ده شعب متزن نفسياً ثابت خاشع


بجد وكسة .. خلاص مش قادر استحمل

إحنا ليه كده ..
وليه ده بيحصل ..
مصر دى يا جماعة بقت بتاع الناس الكلاس بس

لازم يكون معاك عربية جامدة و ساكن فى حته جامدة

القطامية هايتس .. الرحاب هايتس .. علشان يدوبك تقدر تستمع بالحياة ..
علشان تقدر تأكل أكل نضيف و تشرب مياه نضيفة ...

مش أكل مسرطن درجة ثالثة من اللى بناكله من السوق مليان مبيدات و بلاوى

علشان تقدر تدخل عيالك مدارس جميلة نظيفة إستثمارية طبعا ً

علشان يلاقوا العلم و الرعاية و الاهتمام

يعنى لازم تدفع ..

والله يا جماعة الشباب دا غلبان قوى ..
طالع من الكلية مش عارف هايعمل ايه ..
مش عارف يشتغل ايه و ايه مستقبله وهوا عاوز ايه ..

ضغظ .. ضغظ .. ضغظ

فى البيت فى الشغل فى المواصلات فى الشارع فى القهوة فى الخروج فى الدنيا كلها ..

يعنى لازم تدفع ..

علشان تقدر تقعد فى مكان كويس تقدر تفكر فى شغلك فى حياتك فى مستقبلك ..

بجد كتير .. مش قادر خلاص ..
يعنى أمشى من البلد دى و اروح اى حته

بعد كل التعب ده فى مصر
هاسيب كل ده وامشى واسيب كل حاجة ورايا

كان نفسى أحب و استقر فى بلدى
وأحس بالامان و والراحة
نفسى انتج و انمى بلدى و احس انى ليا دور فعال فى دنيتى ...
يارب خلاص مش قادر .. يارب إصلح ليا حالى و نور بصيرتى

معتدش شايف ولا فاهم اى حاجة ..
بقيت عايش وخلاص فى الدنيا كرامتى بتداس
من شويه بنى آمدين يتقال عليهم ناس

ليه يامصر بقيتى مداس لكل واجد صايع ما عنده إحساس
بعد ما كنت برفع رأسى و اقول انا مصرى من الاساس

يا ترى حفضل احبك يا مصر علشان انتى امى
و حبيبتى و كل دنيتى

ولا هافضل شايفك متلوثة بناسك

مش عارف اعمل ايه .

والبقية تأتى ..

Powered By Pixel Dream

.. أوقــــــا ت

بكسل خلاص معدش فاهم حاجة
صحيح ممكن فى يوم من الأيام
الأقى بنت احبها بجنون زى ما الناس بتحكى قصص و وبتغنى

مش عارف .. يمكن ..
وأعد اكلم نفسى وأقول
(أنتى فين يا من أحببتك قبل ما أقابلك ..
والله كده فعلاً .. انا فعلاً عايش معاكى و بيكى و ليكى ...)

انا بهلوس أخر حاجة ..مش كده ..
اوقات بحس انى نفسى أعيش مع بنت كويسة طيبة ..
نعيش نحب بعض و نسند بعض فى الدنيا المتعبة اللى إحنا عايشنها

وأوقات بحس انى ناشف و ماليش قلب وان الموضوع ده أى كلام
وارجع وأقول أنا اللى عامل فى نفسى كده .. أه والله فعلاً
انا اللى مقسى نفسى علشان أقدر أعيش فى الحياة و مابقاش فريسة سهلة
تنكسر و تتجرح من ناس كتير مابقاش عندهم قلب ..
على رأى الحاجة إنسانة
( يا تكون قد الحياة ياتعيش وحيد بين الدروب )

وأوقات بقول يا عم أتوكس انت عاوز تحب و احدة تتعبها معاك وأنت لسا إمكانياتك على قدها
و الدنيا كلا يوم فى غلا الا حاجة واحدة بترخص و هو .. الإنسان

الإنسان الى بيحب ربنا و بيخاف منه و نفسه فى جنته
و نفسه يبقى ليه رسالة فى الدنيا يعيش علشانها ولو اتجوز
و ربنا كرمه بعيال قمامير يعلمهم الصلاة و يحفظهم قرأن و لما يموت يدعولوه بالرحمة

واوقات ... كلها بتعدى .. فرح .. حزن .. تهييس .. أى حاجة ..
على فكرة اللى تاعبنى دلوقتى انى مبطلتش عياط من أول كلمة فى البوست المنيلة لحد دلوقتى .. ليه
مش عارف ..

عدى اليوم برده النهاردة .. وانا زى ما انا ..
لوحدى برده بتونس بس بكلمات مبعثرة تحمل فى طياتها الكثير من الأمال و الاحزان و الرجاء و الاوهام و اوقات ...

اوقات من عمرى بنعدى وانا واقف قصاد نفسى
بحاول أطلع من إحساس الوحدة اللى بيقتلنى

ايوه سامع من جوايا همس بيقولى صدقنى يا بكسل حتى لو اللى انت عاوز تعيشه اتحقق
برده هاتبقا لوحدك .. لما تموت هاتبقا لوحدك .. عملك بس هوا اللى خايبقالك ..
قوم و صلى و ادعى ربنا برجاء و تاكد من انه أقرب ليك
عمرك ما هتأنس الا بغير محبته و رضاه ...
كلام حلو مش كده ..
ياترى وانت بتقرا كلامى حسيته .. فرق معاك ..

اوقات ...
لسا قلبى الجزمة بيزن عليا ..
بلا يا بكسل قوم دور على حب .. دور عليها هتلاقيها ..

أوقات ...
هوا طريق لازم امشيه .. بالطول بالعرض هأقضيه ..
لوحدى او معايا حد .. هتفرق يا ترى ...

كفاية كده انا زهقت ...
لو ليا نفس هاكمل البوست دى أو هاشيلها كلها ...

سلام مؤقت ...

مشهد جميل من فيلم Cast Away


بين توم هانكس (Chuck)
هيلين هنت (Kelly)


(Kelly) I always knew you were alive.
I knew it.
But everybody said
I had to stop saying that,
that I had to let you go.
I love you.
You're the love of my life.

(Chuck) I love you too, Kelly.
More than you'll ever know.

الموسيقى التصويرية للفيلم لو حد مهتم o_0
Right Click , Save Target As

Cast_Away_End_Credits.mp3

Powered By Pixel Dream